फिजिक्स या विषयाबद्दल आज शैक्षणिक क्षेत्रात अनेक गैरसमज आहेत. बरेच विद्यार्थी व त्यांचे ऐकून काही पालक या विषयास अत्यंत कठीण विषय मानतात हे आपण समजू शकतो, परंतु बरेच शिक्षकदेखील या विषयास कठीण विषय संबोधतात हे मात्र चुकीचे. हा विषय कठीण नसून थोडा जास्त सरावाचा आहे इतके नक्की. सायन्स शिकण्याकरीता विद्यार्थ्यांमध्ये वैज्ञानिक दृष्टीकोन असावा लागतो. असेच विद्यार्थी सायन्स आणि पर्यायाने फिजिक्स चांगले शिकू शकतात.

या विषयाची बौद्धिक गरज इतर विषयांपेक्षा भिन्न आहे हे मात्र निश्चित. लहानपणापासूनच आपण बल ही संकल्पना शिकत असतो परंतु इयत्तेनुसार या संकल्पनेची व्याख्या बदलत जाते. म्हणून ११ वी , १२ वीच्या विद्यार्थ्यांना एखाद्या संकल्पनेचे ज्ञान खालील इयत्तापासून माहीत असणे आवश्यक आहे. या विषयात केवळ व्याख्या पाठ असून चालत नाहीतर त्यांचे आर्थ स्पष्ट करतायेणे, त्यांचा इतर ठिकाणी वापर करता येणे हे अपेक्षित आहे.

हा विषय केवळ त्यालाच सोपा वाटू शकतो ज्याला चांगली आकलन क्षमता, कल्पनाशक्ती, स्मरणशक्ती आहे. जो विद्यार्थी आपल्या एकूण अभ्यासातील निम्मा वेळ या विषयाकरिता देतो, २ वर्षे सातत्याने या विषयाचा आलेख चढता ठेवू शकतो, या विषयाच्या आभ्यासाशिवाय दुसरा पर्यायच नाही हे ज्याला माहित आहे तोच विद्यार्थी कोणतीही प्रवेष परीक्षा यशस्वी होवू शकतो हे निश्चित.